بروک آ مالی سال انا 1450 کھرب نا بنجائی بجٹ قومی اسمبلی ٹی پیش کننگا، سرکاری ملازم آتا تنخواہ تیٹی 30 آن 35 درسد، پنشن اٹی 17.5 درسد ودکی نا سلاہ، شونداری پروگرام نا کچ 1150 ارب روپئی مریک

قومی اسمبلی ٹی بروک آ مالی سال 2023-24نا 1450 کھرب نا بنجائی بجٹ ءِ پیش کننگا، سرکاری ملازم آتا تنخواہ تیٹی 30 آن 35 درسد وخت اس کہ پنشنر آتا پنشن اٹی 17.5 درسد نا ودکی نا سلاہ تننگانے، سرکاری بشخ انا شونداری پروگرام نا کچ 1150 ارب روپئی تخنگانے، شونداری نا ہدف بیرہ 3.5 درسد تخنگانے، بروک آسال افراط زر انا کچ اندازاََ 21 درسد اسکان مریک، بجٹ نسخان 6.54 درسد و پرائمری سرپلس جی ڈی پی نا 0.4 درسد مریک، برآمد آتا ہدف 30 ارب ڈالر وخت اس کہ ترسیلات زر انا ہدف 33 ارب ڈالر تخنگانے، ایف بی آر کٹیا نا کساس 9200 ارب روپئی ءِ ہراٹی صوبہ غاتا بشخ 5276 ارب روپئی مریک، بنجائی نان ٹیکس محصولات 2963 ارب روپئی، بنجائی حکومت نا کل آمد 6887 ارب روپئی مریک، بنجائی حکومت نا کل خڑچ آتا کساس 14460 ارب روپئی ءِ ہراٹی سود انا مد اٹی ادائیگی آ 7303 ارب روپئی خڑچ مریک۔ ملکی دفاع کن 1804 ارب روپئی، سول انتظامیہ نا خڑچ آتیکن 714 ارب روپئی جتا کننگ انگ ءِ، پنشن نا مد اٹی 761 ارب روپئی جتا کننگانے، بجلی گیس و ایلو بشخ آتیکن 1074 ارب روپئی نا زر بطور سبسڈی جتا کننگانے۔ آزاد کشمیر گلگت بلتستان، خیبرپختونخوا ٹی اوار مروک ضلع، بی آئی ایس پی ، ایچ ای سی، ریلویز و ایلو محکمہ غاتیکن 1464 ارب روپئی نا گرانٹ جتا کننگانے، مسلم لیگ (ن) نا حکومت مستین اٹی ہم ملک ءِ مشکل آتیان کشا و داسہ ہم تینا سیوتی جماوعت آتون اواری اٹ ملک ءِ شونداری نا کنڈا دننگ کن کوشست کننگ ءِ، حکومت سیاست آخا ریاست بچاؤ پالیسی آ عمل کرے، تینا سیاسی ساکھ انا قربانی ءِ ترسا زرگزران نا بحالی ءِ اولیت تس۔ جمعہ نادے آ قومی اسمبلی ٹی بنجائی وزیر خزانہ سینیٹر اسحاق ڈار بروک آ مالی سال 2023-24ء نا بنجائی بجٹ ءِ پیش کرے۔ اوبجٹ نا بناء آ 2013ء آن 2017 ء اسکان نا مسلم لیگ (ن) نا دور حکومت و تحریک انصاف نا 2018ء آن 2022ء نا دور انا تقابلی جاچ ءِ پیش کرے۔ اوپارے کہ مالی سال 2016-17ٹی وزیراعظم محمد نواز شریف نا کماشی ٹی پاکستان نا زرگزران نا شرح نمو 6.1 درسد آ سرمسوسس۔ افراط زر انا کچ 4 درسد وخت اس کہ فوڈ انفلیشن اٹی سالانہ اوسطا ودکی بیرہ اِرا درسد ئسک۔ بجلی نا پوسکن آ ڈٹ آتیان ملک اٹی بجلی نا لوڈشیڈنگ چٹک۔ ضرب عضب و ردالفساد آپریشن و پاکستان نا فوج انا قربانی نا مرہون منت مچ آ ملک اٹی دہشت گردی نا ناسور نا مون ءِ توننگا۔ پاکستان اٹ امن و ایمنی و سیاسی سوگوی ئسک، داحالیت آتیٹی گچین جمہوری حکومت نا برخلاف سازش آتا جال اس تالان کننگا ہرانا نتیجہ ٹی اگست 2018 ٹی اسہ سلیکٹڈ حکومت اس بس ہرانا زرگزرانی بے سہبی تیا ہموخس پاننگ گنج اسے کہ ہرا ملک 2017 ء ٹی دنیا نا 24 می بھلا زرگزران جوڑ مسوسس او 2022 اٹی 47می نمبرآ بس۔ وزیرخزانہ پارے کہ داوخت آ پاکستان زرگزرانی تاریخ نا مشکل آ ریسہ غاتیان گدرینگ انگ ءِ ، دا زرگزرانی حالیت آتا خرابی نا اصل زموار پاکستان تحریک انصاف نا مسکوہی حکومت ءِ۔ ساڑی حالیت تدوک آ حکومت نا زرگزرانی بدانتظامی ، وڈی خوری، عناد پسندی و تینائی گری نا شاخسانہ ءِ۔ وزیرخزانہ پارے کہ تحریک انصاف حکومت نا غلط زرگزرانی پالیسی تا سوب آن کرنٹ اکاؤنٹ نسخان 17.5 ارب ڈالر آن گدرینگا، زرمبادلہ نا کوڑی تیٹی ترندی اٹ کمتی مس، آئی ایم ایف پروگرام نا پوروی پاکستان کن بھاز اہم ئسک ولے تحریک انصاف نا حکومت دانازرک حالیت آتیٹی حالیت آتے رزاک اٹ خراب کرے، پیٹرول و بجلی نا نہاد آتیٹی سبسڈی نا کمک اٹ کمتی کرے، ہندن ءُ گام گیج کرے ہراکہ آئی ایم ایف نا شڑت آتا خلاف ورزی ئسر، مسکوہی حکومت نا وزیرخزانہ فون کرسا اِرا صوبائی وزیر خزانہ غاتیا زور شاغا کہ او تینا قومی فرض ءِ سرتفرسا آئی ایم ایف نا پروگرام ءِ لتاڑر، دا گام گیج پوسکن آ حکومت کن بارودی سرنگ تالان کننگ آنبار ئسک ہرافتیان مالی نسخان اٹی ودکی مس و پاکستان و آئی ایم ایف نا تعلقداری تے بھاز نسخان رسینگا وخت اس کہ دُن کہ دُز شور کے آنبار دا غٹ حالیت آتا زمواری ءِ پوسکن آ حکومت آ شاغنگ نا کوشست کرے۔ اوفتے یخین ئس کہ زرگزرانی حالیت آک ہنداخہ خراب مریرہ کہ کس اس پاکستان ءِ ڈیفالٹ مننگ آن بچفنگ کپک، دا بے کچ غیر زموارانہ طرزعمل ئسک، ولے وزیراعظم شہباز شریف و سیوتی جماعت آتا پبی کمک اٹ ہندن ءُ زرگزرانی فیصلہ کننگ انگ ءِ ہرافتا سوب آن او ملک دشمن مخلوق نا عزم آک پورو مفننگ ءُ۔ وزیرخزانہ پارے کہ ساڑی سیوتی حکومت اقتدار اٹ بننگ تون آئی ایم ایف پروگرام ءِ بحال کننگ نا کوشست کرے، حکومت ءِ سمائسک کہ پاکستان ءِ زرگزرانی بحالی کن بھاز مشکل گام گیج ہرفوئی تمک، ہرانا سوب آن الس ءِ کبینی و نیزگاری ٹی ودکی تون مون تروئی تمک، روپئی نا قدر اٹی کمتی و شرح سود اٹی ترندی اٹ ودکی نا نتیجہ ٹی زرگزرانی مشکل آتیٹی ودکی مس، حکومت سیاست آخا ریاست بچاؤ پالیسی آ عمل کرے، تینا سیاسی ساکھ انا قربانی ءِ ترسا زرگزران نا بحالی ءِ اولیت تس۔ اوپارے  کہ جون 2018ء ٹی پاکستان نا سرکاری وامک کم وود 25 ٹریلین روپئی ئسر وخت اس کہ پی ٹی آئی نا زرگزرانی بدانتظامی و بڑزانگا بجٹ نسخان تا سوب آن دا وامک مالی سال 2021-22اسکان 49 ٹریلین روپئی اسکان سرمسوسر۔ چارسال ا نا دور اٹی ہنداخہ وام ہلنگا ہرا تدوک آ 71 سال اٹی ہلوک آ وام تا 96 درسد ئسر۔ اوپارے کہ ساڑی حکومت بجٹ نسخان ءِ کم کننگ کن کفایت شعاری آن کاریم ہلک، خڑچ آتیٹی کمتی کننگا ہرانا سوب آن بجٹ نسخان تدوک آ مالی سال اٹی جی ڈی پی نا 7.9 درسد آن کم مرسا داسال 7 درسد مس، ساڑی حکومت وزیراعظم شہباز شریف نا دور اندیش کماشی ٹی تینا سیاسی نسخان نا پرواہ ءِ کننگ آن بیدس ملک ءِ ڈیفالٹ مننگ آن بچفے۔ وزیرخزانہ پارے کہ 9 مئی آ پیش بروک آ است ہسون، شرمناک ملک دشمن واقعہ غاتیٹی سیاسی جماعت نا لویس اٹ سلہہ بند دہشت گرد جتھ آک پاکستان نا سالمیت ، ساکھ و قومی وقار ءِ مجروح کننگ نا گھناؤنی و منظم سازش کریر، پاک فوج انا شہید آتا یات گار آتا بے شرفی ءِ کننگا، ملک انا تاریخ اٹ اولیکو وار دفاعی تنصیب آتے بربریت نا شست کننگا، داوڑنا ملک دشمن زموار آک ہچ ءُ نرمی و رحم دلی اسے نا حقدار افس، اوفتے پاکستان نا کانود نا رداٹ سخت سزا تننگے، تانکہ آخبت کس اس داوڑنا ڈوہ کپ۔ او پارے کہ تدوک آ اسہ سال اٹی پاکستان ءِ نوکاپ نا ناگہانی آفت تون مون تروئی تما، ہرانا نسخان تا کساس 30 ارب ڈالر آن زیات ءِ۔ اوپارے کہ تدوک آ اسہ تُو اٹی حکومت اِرا وار پیٹرولیم منصوعات آتا نہاد آتیٹی کمتی کرے، جولائی 2022ء آن داتم اسکان حکومت کم و ود 12 ارب ڈالر نا درملکی وام تا ادائیگی کرینے، اوکان پد ہم ملکی زرمبادلہ نا کوڑیک 9 ارب 34 کروڑ ڈالر ءُ، ساڑی حکومت کشاری بشخ آ نوکاپ نا بھسکار اثر و جم مشکل اتے مر کننگ کن اِراہزار ارب روپئی آن زیات بزغر پیکج تس ہرانا سوب آن کشاری بشخ اٹی 1.5 درسد گروتھ مس، خولم نا بمبر پیدوار مس، حکومت نوکاپ آن زہمی علاقہ غاتیٹی پوسکن تفنگ کن 578 ارب روپئی نا ڈٹ آتا بناءِ کرینے۔ وزیرخزانہ پارے کہ زرگزران اٹی گچینی نا سمت آن پد ہم داسکان زرگزران ءِ چیلنج مون تروک ءِ، بروک آ مالی سال اکن شونداری نا ہدف بیرہ 3.5 درسد تخنگانے، کشاری بشخ انا گچینی  کن کشاری وام تا حد ءِ 1800 ارب روپئی آن ودفسا 2250 ارب روپئی کننگانے۔ بروک آ مالی سال اٹی پنجا ہزار کشاری ٹیوب ویل آتے شمسی توانائی آ گدریفنگ کن 30 ارب روپئی جتا کننگانے، ملک اٹی آب اٹ بج آتا کاریم اٹ اتنگ ءِ مون آ دننگ کن غٹ درآمدی ٹیکس و ڈیوٹی تے چٹفنگ انگ ءِ، برنج نا پیدوار ءِ ودفنگ کن سیڈر، رائس پلانٹرز و ڈرائیرز ءِ ہم ڈیوٹی و ٹیکس آن استثنیٰ نا تجویز ءِ، وزیراعظم یوتھ بزنس و ایگریکلچر لون اسکیم نارداٹ چنکا و نیامی درجہ نا آسان وام تیا مارک اپ سبسڈی کن 10 ارب روپئی جتا کننگک، درآمدی یوریا کھد آ سبسڈی کن 6 ارب روپئی جتا کننگانے۔ اوپارے کہ آئی ٹی و اوڑتون تعلقدار خذمت آتا است بڈی کن آئی ٹی برآمد آتے ودفنگ کن انکم ٹیکس نا 0.25 درسد رعایتی شرح نا آسراتی 30 جون 2026 اسکان برجاتخنگک، فری لانسر ءِ گوشوارہ و سیلز ٹیکسز رجسٹریشن آن مستثنیٰ گوندنگانے