اسلام آباد اچ کلچرل فورم تے پاکستان نیشنل کونسل آف آرٹس دی سانجھ نال “پاکستان دی مادری زباناں دی موسیقی ” دے عنوان نال پروگرام آندے جمعے کوں تھیسی

 اسلام آباد اچ کلچرل فورم تے پاکستان نیشنل کونسل آف آرٹس دی سانجھ نال “پاکستان دی مادری زباناں دی موسیقی ” دے عنوان نال پروگرام 16 جون 2023ء جمعے دے ݙینھ شام کوں ساݙھے چھی وڄے پاکستان نیشنل کونسل آف آرٹس اچ تھیسی جیندے اچ اردو، سندھی، پنجابی، ڈھاڈکی، تے سرائیکی دے علاوہ ملک دی وکووکھ زباناں دی موسیقی پیش کیتی ویسی۔ ایں موقع تے وائلن دی پرفارمنس، سندھی جھمر، چولستانی رقص، میڈلے اتے موسیقی دے ٻے رنگ پیش کیتے ویسن۔ انڈس کلچرل فورم دے جنرل سیکرٹری اشفاق چانڈیو سرائیکی سروس نال ڳالھ مہاڑ کریندیں ہوئیں ڈسایا جو انڈس کلچر فورم ہک ڈھاکے توں پاکستان دی زباناں دی بڑھوتری بارے کم کریندا پے خاص طور تے پاکستانی اچ مردیاں ہوئیاں زباناں بارے ایندا اہم کم اے۔ انہاں آکھیا جو سال ہک واری فورم ولوں ہک میلہ تھیندے جیندے اچ پاکستانی زباناں اچ نویاں چھپݨ آلیاں نثر اتے شاعری دی کتاباں دی گنڈھ گھلائی تھیندی اے ایں توں انڄ مشاعرے اتے ساری زباناں دی موسیقی وی پیش کیتی ویندی اے۔ ایں میلے سبب مختلف نسلاں اتے کلچر دے لوکاں کوں ہک چتھ تلے ٻاہوݨ اتے ہک ٻے دے نیڑے آوݨ دا موقع ملدے۔ ایں سلسلے دی لڑی اے جو عدم برداشت دے دور اچ موسیقی دا ہک نویکلا پروگرام رکھیا ڳے۔ انہاں آکھیا جو اپݨی مادری زباناں نال محبت کرݨ آلے سارے احباب کوں اپݨی فیملے رلے اتے دوستاں سودھے ایں سوھݨی تقریب اچ شریک تھیون