وزیراعظم محمد شہباز شریف نا فرانس نا صدر ایمانوئل میخواں تون اوڑدہی، ہڑتوم آ کنڈآتا است خواہی نا امور آ رابطہ ءِ برقرار تخنگ آ امنائی
وزیراعظم محمد شہباز شریف فرانس نا صدر ایمانوئل میخواں تون اوڑدہی کرے ہراٹی ہڑتوم آ راہشونک ہڑتوم آ کنڈآتا است خواہی نا امور آ رابطہ غاتے برقرار تخنگ آ امناکریر۔ پی ایم آفس نا میڈیا ونگ آن جاری بیان نا رداٹ اوڑدہی پوسکن آ جہانی مالیاتی معاہدہ نا سرحال آ اڈ ہلوک سروکی دیوان نا وخت آمس۔ وزیراعظم محمد شہباز شریف پوسکن آ جہانی مالیاتی معاہدہ غا سروکی دیوان بٹنگ آ صدر ایمانوئل میخواں ءِ خراج تحسین پیش کرے۔ اوسروکی دیوان اٹی سلہ خلنگ و جم و جوش اٹ مہمانداری آ فرانسیسی صدر نا منت واری ءِ ہم ہرفے۔ وزیراعظم فرانسیسی صدر تون گپ وتران کرسا پارے کہ نی پدتموک ملک آتون مالیاتی انصاف آ تالان نظام نا کنڈآ جیرت مندانہ ءُ گام اس ہرفیس۔ اوفرانسیسی صدر نا منت واری ءِ ہرفسا پارے کہ پدتموک ملک آتے وسیلہ غاتا مفننگ، وام وسود انا زرتس نا بھاریم و منجمد شونداری نا ویل مون تروک ءِ۔ وزیراعظم پارے کہ پوسکن آ جہانی مالیاتی معاہدہ نا رداٹ وام تا مین اٹ ڈبنگوک پدتموک ملک آتا کمک وخت انا گرج ءِ تانکہ ہموجاگہ نا الس ءِ ریلیف ملنگ کے، موسمیاتی بدلی نا بھسکار اثرآک مہالو آن ویل آتا گواچی پدتموک ملک آتے پین مشکل آتیان دوچار کرینے، اہم ویل آ جہانی امنائی سلاہ ودی کننگ کن نی اہم ءُ کوشست اس کریس۔ صدر ایمانوئل میخواں سروکی دیوان اٹی بشخ ہلنگ آ وزیراعظم محمد شہباز شریف نا منت واری ءِ ہرفے
