آئی ایم ایف ءِ گوما منوگری ءَ چہ ملکی معیشت برجا بیت، گوستگیں سئے ماہ ءَ چہ چین ءَ پاکستان ءَ را ڈکال بوھگ ءَ چہ رکھینتگ، حکومت ءِ ھمبراھیں پارٹی آں ملکی معیشت ءِ برجائی ءِ واستہ پیسلہ آنی سیاسی قیمت داتگ، مزن وزیر محمد شہباز شریف ءِ پریس کانفرنس
مزن وزیر محمد شہباز شریف ءَ گوشتگ کہ پاکستان ءُ آئی ایم ایف ءِ نیام ءَ سٹاف لیول منوگری ءَ چہ پد 12 ل مئی ءَ ایگزیکٹو بورڈ ءَ چہ منظوری گپتگ، جوانیں سفارتکاری ءُ جوانیں محنت ءَ چہ پد پاکستان ءُ آئی ایم ایف ءِ نیام ءَ 3 ارب ڈالر ءِ سٹاف لیول منوگری بوت کتگ۔ آئی ایم ایف ءِ گوما منوگری ءَ چہ ملکی معیشت برجم بوتگ۔ گوستگیں سئے ماہ ءَ چہ چین ءَ پاکستنا ءَ را ڈکال ءَ چہ رکھینتگ۔ سعودی عرب ءُ متحدہ عرب امارات ءَ مئے باز ھمبراہ داری کتگ۔ ملکی معیشت ءِ برجائی ءِ واستہ جوانیں منصوبگ جوڑ کتگ۔ وھد ءُ پاس سرجم بوھگ ءَ چہ حکومت ءَ یل کناں۔ گچین کاری ءِ تاریخ دیگ ءُ کنائینگ الیکشن کمیشن ءِکار انت۔ نواز شریف علاج ءِ واستہ ڈن ملک ءَ انت۔ زور وطن ءَ واپس کئیت۔ اے پلینڈ ءَ یک سالے پندل ساچگ ءَ چہ ملک ءَ را تباہ ءُ برباد کتگ۔ استیں حکومت ءِ دور ءَ یک کلدار ءِ کرپشن ءِ کیس دیم ءَ نہ اتکگ۔ اے ھیالانی درشانی آئی ءَ آدینگ ءِ روچ ءَ پریس کانفرنس ءِ ساھت ءَ کت۔ اے موہ ءَ بنجاھی وزیر ھزانگ سینیٹر اسحاق ڈار ، بنجاھی وزیر اھوالکاری ءُ شنگ کاری مریم اورنگزیب ءُ گورنر پنجاپ انجینئر بلیغ الرحمن ھم ساڑی ات
