میران شاہ اچ دہشت گرداں اتے سکیورٹی فورسز وچال فائرنگ دا تبادلہ، ترائے دہشت گرد ہلاک، ترائے اہلکار شہید تھی ڳے

 راولپنڈی شمالی وزیرستان دے علاقے میران شاہ اچ دہشت گرداں اتے سکیورٹی فورسز وچال فائرنگ دا تبادلہ، ترائے دہشت گرد ہلاک، ترائے اہلکار شہید تھی ڳے۔ آݙت وار کوں آئی ایس پی آر ولوں جاری پریس ریلیز موجب نو اتے ݙاہ جون دی رات شمالی وزیرستان دے ضلع میران شاہ دے عام علاقے اچ فوج اتے دہشت گرداں وچال فائرنگ تھئی۔ سکیورٹی فورسز مؤثر طریقے نال دہشت گرداں دے خلاف کاروائی کریندیں ہوئیں ترائے دہشت گرداں کوں جہنم واصل کیتا اتے چار دہشت گرد زخمی تھیے۔ ہلاک دہشت گرداں وتں اسلحہ وی برآمد تھیا۔ شدید فائرنگ دے تبادلے اچ صوبیدار اصغر علی (عمر 40 سال سکنہ لکی مروت)، سپاہی نسیم خان (عمر 26 سال، سکنہ لکی مروت ضلع) اتے سپاہی محمد زمان (عمر 22 سال، سکنہ ایبٹ آباد) بہادری نال لڑ تے شہید تھی ڳے۔