وزیردفاع نا بجٹ تقریر اٹی استاد آتا بابت پاروک آ لوز آتیا معذرت

 وزیر دفاع خواجہ محمد آصف بجٹ تقریر اٹی استاد آتا بابت پاروک آ لوز آتیا معذرت کرے وخت اس کہ اسپیکر قومی اسمبلی ایوان نا کارروائی آن دا لوز آتے حذف کرفے۔ جمعہ نادے آ قومی اسمبلی ٹی ذاتی وضاحت آ وزیر دفاع خواجہ محمد آصف پارے کہ اللہ نمے رکھا، اللہ تعالیٰ مدام نمے تینا عافیت و پناہ ٹی تخے، اللہ نا اخس ہم شکر ءِ ادا کننگے کم ءِ۔ اوپارے کہ منہ دے مست ای تقریر کریسٹ ہراٹی وائس چانسلر آتا بابت ہیت کریٹ، وائس چانسلر آک نے کنا اسہ لوز اسے آ برانز کرسا چٹھی اس نوشتہ کرینو، کنا درخواست ءِ کہ او لوز ءِ کارروائی آن حذف کننگے، کنے تینا دا لوز آ افسوز ءِ۔ ای استاد آتا  است اٹ شرف ءِ کیوہ۔ اوکنا لوز انا سہی مذمت ءِ کرینو۔ اوپارے کہ تعلیمی ادارہ غاتیٹی سیاست مننگ ءِ، ننے درسگاہ تیٹی تینا چناتا تربیت آ چکار کروئی مریک، کنا تقریر نا بنداوی مسخت کرپشن ئسک، ملک انا غٹ زند انا بشخ آتیٹی کرپشن نا ہیت ءِ کریسٹ، اگہ استاد آتا است آزاری مسنے تو معذرت خواوہ۔ اسپیکر قومی اسمبلی پارے کہ ای دا  چٹھی ءِ میڈیا ٹی خنانٹ، داسکان کنا مون آ بتنے، نی اسہ سینئر ءُ سیاست دان اسے اُس، نا بھلنی ءِ کہ نی معذرت کریس، استاد آتا شرف ننا غٹ انا است آتیٹی ءِ، استاد آک پوسکن آ چین انا تربیت ءِ کیرہ، نن استاد آتا اہمیت ءِ مون آ تخسا آئین نا گولڈن جوبلی نا وخت آ غٹ وائس چانسلر آتے بٹنگان۔ اوپارے کہ غٹ باسک آتے مرے کہ  تران اٹی لوز آتے سہی وڑاٹ پیش کیر۔ اسپیکر خواجہ آصف نا تقریر آن ہمو لوز ءِ حذف کرے