شونداری ڈٹ آتیٹی آب آ ہچ ءُ سمجھوتہ اس کننگپک، وزیراعظم محمد شہباز شریف
وزیراعظم محمد شہباز شریف پارینے کہ شونداری ڈٹ آتا تفنگ اٹ سلنگ ءِ منپنہ، شونداری ڈٹ آتیٹی آب آ ہچ ءُ سمجھوتہ اس کننگپک۔ اوپارت کرے کہ شونداری ڈٹ آتا معینہ مد اٹی پوروی ءِ پک کننگے۔ وزیراعظم آفس میڈیا ونگ آن جاری پریس ریلیز نا رداٹ وزیراعظم محمد شہباز شریف نا کماشی ٹی اسلام آباد اٹی برجابھلا شونداری ڈٹ آتیا جاچ دیوان اس جمعہ نادے آ مس۔ دیوان اٹی بنجائی وزیر داخلہ راناثناء اللہ، سلاہکار وزیراعظم احدخان چیمہ، مسکوہی قومی اسمبلی نا باسک حنیف عباسی، ڈی جی ایف ڈبلیو او، ڈی جی این ایل سی، چیئرمین سی ڈی اے و تعلقدار بڑزکو کمامدارآک بشخ ہلکر۔ داوخت آ وزیراعظم پارے کہ چیئرمین کیپٹیل ڈویلپمنٹ اتھارٹی تعمیراتی کاریم نا تینٹ چاروکی ءِ کرسا آب ءِ پک کے ، شونداری ڈٹ آتا لینڈ اسکیپنگ آ خصوصی چکار کننگے۔ وزیراعظم پارے کہ شونداری ڈٹ آتا لینڈ اسکیپنگ ءِ کننگ نا وخت آ جہانی آب ءِ مون آ تخنگے۔ دیوان ءِ سی ڈی اے نا اسلام آباد اٹی برجاشونداری ڈٹ آتیا پیش رفت آن سرجمی اٹ معلومدار کننگا
