اسلام آباد ہائی کورٹ چیئرمین پی ٹی آئی نا برخلاف توشہ خانہ فوجداری کارروائی ، کیس انا کارروائی ءِ توننگ نا پرمان اٹی 14 جون اسکان ودکی کرے

اسلام آباد ہائی کورٹ پاکستان تحریک انصاف نا چیئرمین نا برخلاف توشہ خانہ فوجداری کارروائی کیس انا کارروائی ءِ توننگ نا پرمان اٹی 14 جون اسکان ودکی کرے۔ پنچ شنبے نادے آ عدالت عالیہ نا چیف جسٹس عامر فاروق چیئرمین پی ٹی آئی نا برخلاف توشہ خانہ فوجداری کارروائی کیس انا سماعت ءِ کرے۔ سماعت اٹی چیئرمین پی ٹی آئی نا وکیل خواجہ حارث و الیکشن کمیشن نا کنڈآن امجد پرویز ایڈووکیٹ پیش مس۔ سماعت اٹی خواجہ حارث بروک آ ہفتہ اسکان کیس ءِ پدبٹنگ نا خواست کرے ہراڑا الیکشن کمیشن نا وکیل پارے کہ عدالت ٹرائل کورٹ نا کارروائی ءِ تورینے، اگہ دا وخت خواہنگ  ءِ تو کنے ہچ ءُ اعتراض اس اف ، عدالت ٹرائل کورٹ ءِ کارروائی آن توننگ کن پرمان ءِ پدی ہلے۔ الیکشن کمیشن نا وکیل امجد پرویز ٹرائل کورٹ ءِ کارروائی آن توننگ نا پرمان ءِ پدی ہلنگ نا خواست کرسا پارے کہ عدالت حکم امتناعی چٹفسا ٹرائل کورٹ ءِ حتمی فیصلہ جاری کننگ آن توننگ کیک ہندا سوب آن عدالت آن اسٹے ءِ چٹفنگ نا خواست ءِ۔ عدالت چیئرمین پی ٹی آئی نا برخلاف توشہ خانہ فوجداری کیس انا کارروائی ءِ توننگ نا پرمان اٹی 14 جون اسکان ودکی کرے