شہباز شریف ملک ݙیوالہ تھیوݨ توں بچائے، نویں مالی سال صنعتکاری کوں ترقی ݙیسوں، تیکھے 3.5 فیصد جی ڈی پی نمو ڳھن ڳھنسوں، اسحاق ڈار دی پریس کانفرنس
وفاقی وزیرخزانہ ومحصولات سینیٹرمحمد اسحاق ڈار آکھیے جو شہباز شریف ملک ݙیوالہ تھیوݨ توں بچائے، نوین مالی سال صنعتکاری کوں ترقی ݙیسوں، تیکھے 3.5 فیصد جی ڈی پی نمو ڳھن ڳھنسوں، برآمدات اچ آئی ٹی دا شعبہ ساݙی ترجیح اے، محصولات دے نویں ذرائع اتے وسائل ڳولیے ویسن، حکومت فائیو ایز (ایکسپورٹ، ایکوئٹی، انرجی، امپاورمنٹ اتے انوائرمنٹ) کوں ترجیح ݙیندی پئی اے، کلی معیشت تکڑی کریسوں، نمو دی بنیاد پائیدار ہووے، تھری ایز دے بعد ہݨ فائیو ایز پالیسی تے اڳو تے دی پالیسی ٻݨائی اے۔ قومی اقتصادی سروے برائے مالی سال 2022-23 دے اجرا ویلھے وفاقی وزیرمنصوبہ بندی پروفیسر احسن اقبال اتے وزیرمملکت ڈاکٹرعائشہ غوث پاشا نال پریس کانفرنس کریندے وزیرخزانہ آکھیا جو ایں ویلھے ملک اوکھ اچوں لڳھدا پئے، ساݙی بدقسمتی اے جو ساݙی معیشت تلو تے لڳی ڳئی اے، ملک کوں ہک واری ول ڄق دی وݙی معیشت ٻݨاوݨ چیلنج اے، پائیدار معاشی ترقی ہدف اے، بیرونی ادائیگیاں کرݨین، اے چیلنجز سارے ساڄھےد اراں دے تعاون نال توڑ پچیسوں۔ انہاں آکھیا جو اسان وݙی محنت نال حسابات جاریہ دے کھاتیاں دا خسارہ ڳھٹائے ٻھل اے ہݨ وادھو تھی ڳئے، پاکستان دی معیشت اچ استحکام کیتے اقدامات جاری رکھسوں، امید اے ملک کوں ولا ترقی دی راہ تے سٹ ݙیسوں۔ وزیرخزانہ آکھیا جو بین الاقوامی مالیاتی فنڈ نال سارے تکنیکی معاملات مکمل ہین، پاکستان 9 ویں جائزہ دے سارے پیشگی اقدامات کرڳھدن، ہݨ ملک دے ݙیوالہ تھیوݨ دا کوئی ݙر کائنی، آئی ایم ایف نال پچھلی حکومت دے وعدے پورے کرݨ کیتے اوکھے فیصلے کیتن جو ساݙے کیتے سیاست توں ودھ ریاست اے، بجلی، توانائی اتے ٻئے شعبیاں اچ اصلاحات کیتن، جامع اتے پائیدارمعیشت نال سرمایہ کاراں دااعتماد ودھسی، جیکر اساں حکومت نہ سنٻھلیندے تاں خدانخواستہ پاکستان ݙیوالا تھی ویندا، ساکوں پراپیگنڈہ تے کن دھرݨ دی بجائے اپݨی معیشت تے اعتماد کرݨا چاہیدے، پچھلی حکومت جی ڈی پی دی شرح نمو 6 فیصد ݙسی ہئی ٻھل پہلے سال منفی بڑھوتری نال بیس(base) کوں وٹایا ڳعے جیندے نال اشاریاں تے وی فرق پئے،2018 اچ مالی خسارہ 5.8 فیصد ہا جیڑھا پچھلے دور اچ 7.9 فیصد تے پڄیے۔ پچھلی حکومت تجارتی خسارہ ودھائے، پالیسی ریٹ 6.1 توں ودھا تے 14 فیصد تے پچائے، اوسط ماہانہ گردشی قرضہ 330 ارب روپے ھا، اتے انہاں 2467 ارب روپے دا گردشی قرضہ چھوڑیے، پچھلی حکومت مجموعی قرضہ 25ہزار ارب روپے توں ودھا تے 49 ہزار ارب پچائے، قرض اچ مجموعی 97 فیصد ودھارا تھئے۔ وزیرخزانہ آکھیے جو سابق حکومت آئی ایم ایف نال وعدے ترور تے معیشت دی ٻیڑی ٻوڑ ݙتی ہئی، اتے پاکستان دی عالمی ساکھ متاثر تھئی اے، پچھلے ہک سال اچ عالمی سطح تے جی ڈی پی دی شرح اچ 50 فیصدکمی تھئی اے، عالمی مہنگائی دی شرح 51 فیصد ودھی اے، عالمی تجارت 5 فیصد ڳھٹی اے جیندے نال پاکستان وی متاثر تھئے، پچھلے سال تاریخی سیلاب وی پاکستان کوں تقریباً30 ارب ڈالر دا نقصان پچائے، سیلاب متاثرہ علاقیاں دی تعمیر نو اتے بحالی کیتے ابتدائی طور تے 4 سال اچ 15 ارب ڈالر لڳسن جیندے اچوں ادھے پیسے پاکستان دی حکومت اتے باقی دے فنڈز دوست ملک اتے ݙوطرفہ کثیرالجہتی شراکت دار ݙیسن
